తిరువూరు కబుర్లు

తిరువూరు-కోకిలంపాడు రోడ్డులో ఈ ప్రాంత క్రీడాకారుల కోసం నిర్మిస్తున్న స్టేడియం ఏ ముహూర్తంలో ప్రారంభించారో గానీ దీని నిర్మాణం నడకలో నత్తను మరిపిస్తుంది. కోట్ల వ్యయంతో నిర్మించిన ఈ స్టేడియం ఒక పద్ధతి ప్రకారం నిర్మించినట్లుగా కనిపించడం లేదు. ఊరి బయట జన సంచారం లేని చోట క్రీడా ప్రాంగణ స్థలంలో దుకాణాల సముదాయాన్ని ఎందుకు నిర్మించారో ఎవరికీ అర్థం కావడం లేదు. గత 5 సం.ల నుండి దీని నిర్మాణం సా…గుతూనే ఉంది. ఈ క్రీడా ప్రాంగణాన్ని ఇప్పటి వరకు ఎవరు ప్రారంభించక ముందే దీని నిర్మాణ నెమ్మదనంలో భాగం పంచుకున్న గుత్తేదారు భవనం ముందు భాగంలో అత్యుత్సాహం ప్రదర్శించి వేలాది రూపాయలు ఖర్చు పెట్టి భారీ శిలాఫలకాన్ని ఆకర్షణీయంగా ఏర్పాటు చేశాడు. ఈ క్రీడా ప్రాంగణానికి నడక కోసం వచ్చే వారు ఇతర క్రీడాకారులు ఈ శిలాఫలకం చూసి ముక్కు మీద వేలు వేసుకుంటున్నారు. ప్రారంభోత్సవం అవ్వకముందే శిలాఫలకం పెట్టేశారేంటనే ప్రశ్న ఒకటి అయితే…ఎప్పుడో ఫిబ్రవరిలో జరగాల్సిన ప్రారంభోత్సవం వాయిదా పడి ఇప్పటిదాకా జరగలేదు గనుక ఇక ప్రారంభం అయిపోయినట్లేనని అనుకోవాలా అనేది రెండో ప్రశ్న. వాస్తవానికి ఫిబ్రవరి 27వ తేదీన ఈ క్రీడా ప్రాంగణానికి రైతు బజారుతో పాటు ప్రారంభోత్సవం జరుగుతుందనుకున్నారు. అయితే మంత్రి అచ్చెన్నాయుడు రాకపోవడంతో ప్రారంభోత్సవం వాయిదా పడింది. ప్రస్తుతం ఆ మంత్రి శాఖ మారడంతో సదరు కాంట్రాక్టర్ నోట్లో ట్రక్కుడు మట్టి కూడా పడింది. మళ్లీ కొత్త మంత్రి గారు తేదీలు ఎప్పుడు ఇస్తారో తెలియదు. దీని ప్రారంభోత్సవం ఎప్పుడు జరుగుతుందో అని యువ క్రీడాకారులు ఆసక్తిగా ఎదురుచూస్తున్నారు. భవనాలు పాడు పడకముందే తిరువూరులోని నందమూరి తారక రామారావు క్రీడా ప్రాంగణాన్ని ప్రారంభించాలని తిరువూరు ప్రజలు డిమాండ్ చేస్తున్నారు.